श्री समर्थ सद्गुरु स्वामी भगवान महाराज –
श्रद्धेचे वसतीस्थान जे आहे ते शुद्ध असेल तर भावना शुद्ध राहील. श्रद्धेचे स्थान जे शुद्ध असावे लागते, ते भक्ताजवळ नसेल तर भावना शुद्ध राहू शकेल का? श्रद्धेचे जे वसतीस्थान आहे ते जर शुद्ध नसेल, भावना शुद्ध राहू शकणार नाहीत. श्रद्धा आहे पण ती कशी, आम्हाला काळजी नाही, आपले बाबा आहेत, काहीही जरी झाले तरी ते बघतील. काही प्रसंग आल्यावर हाक मारल्याबरोबर सद्गुरु येतील. आम्हाला प्रसंगातून सोडवतील, आमचे सांत्वन करतील,
माझे बाबा किंवा माझे सद्गुरू मला बिकट प्रसंगातून सोडवतील अशी सेवेकऱ्यांना खात्री असते. त्यांची श्रद्धा असते. परंतु सेवेकरी हा विचार अडचणीच्या वेळेला करतो. हा त्याचा भाव त्याच्यावर प्रसंग आल्यानंतर असतो. परंतु सेवेकर्‍यांनो तुम्हीच सांगा यासाठीच केवळ शक्ति आहे का?
आपण पाहतो आपल्यात काही ज्योती, काही सेवेकरी असे आहेत की त्यांची मुलेच त्यांना दाद देत नाहीत, त्यांची मुले त्यांचे ऐकत नाहीत. अर्थात सद्गुरूंचे हे कर्तव्य आहे की अशा सेवेकऱ्यांना शांत करणे, त्यांचे सांत्वन करणे, कारण जर सेवेकऱ्याचे मन बेचैन झाले तर भक्ती होणे शक्य नाही. ©️