श्री समर्थ सद्गुरु स्वामी भगवान महाराज – आपण पाहतोच की आपल्याकडे काही मानवांची शुद्धीकरण स्थिती होत असताना काही बलाढ्य तर काही महाबलाढ्य, ८५० पायऱ्यांच्या अघोर ज्योतींचा देखील नाश केला गेला आहे. सर्वस्व ज्या राक्षसाकडे होते, ऋद्धी-सिद्धी, तंत्र-मंत्र अशा देखील अघोरी ज्योतींचा या शुद्धीकरणातून नाश केला गेला आहे.
ज्ञानेश्वर महाराजांनी आपल्या एका अभंगात म्हटले आहे, “आंधळ्याशी जग सारेची आंधळे।” जरी स्थूलात वा स्थूलाने या आघोरांचा नाश केला, तरी देखील सूक्ष्माने त्याच अघोरांनी मानवी देहावर, मनावर ताबा मिळविण्याचा प्रयत्न केलाच. आपण पाहतच आहात की आजही अशांचे मानव उपासक आहेत की नाही?
अशा तऱ्हेने अघोर उपासना करीत, तामस उपासना करीत, जर एखाद्याने म्हटले की मी भक्ती करतो, तर याला काही आधार आहे का? आपल्याला काय पहायचे आहे, काय मिळवायचे आहे, हे प्रत्येकाने विचारपूर्वक पाहिले पाहिजे. आपला राजमार्ग कोणता तर भक्ती! आपल्याला कोणत्या मार्गाने जायचे आहे तर भक्तीने! आपल्याला काट्याकुट्यातून जायचे नाही, गिरीकंदरातून जायचे नाही, दगड खड्ड्यातून जायचे नाही, फक्त राज मार्गाने वाटचाल करावयाची आहे. जरी अवधी लागला तरी आपण आपल्या इप्सित ठिकाणी पोहोचणार!…©️