या विश्वाची घडण कशी आहे? विश्व म्हणजे तरी काय? हे विश्व बीजरुपी आहे का बिजारहित आहे?आकाराच्या रहित जे दर्शन मिळते ते आपणाला पाहिजे आहे का? त्यात सेवेकरी तल्लीन झाला म्हणजे मात्र ते बीज आहे की काय आहे याचे भान रहात नाही.
मसुरेप्रमाणे मोतीयाचे परी | असे दर्शने द्वारी……| बीज दाता मीच आहे, असे म्हटले आहे. मी बीज दाता असलो, तरी बीज स्वरूप आहे अन् त्याच्याही निराळा आहे. जशी सेवेकर्याची पाहण्याची ताकद तसे त्याला दर्शन !
काही सेवेकऱ्यांना अनुभव आहे, काही सेवेकरी दर्शन युक्त आहेत. काही सेवेकर्यांनी अंड्यासारखा शुभ्र आकार असेही दर्शन घेतले आहे. ठराविकच रूपात आहे असे मी सांगू शकणार नाही. म्हणूनच म्हटले आहे, बीज नसता अंडे झाले | तेथे जे योगी रमले….. काही सेवेकऱ्यांनी अनुभवले आहे. म्हणूनच सांगितले आहे, ज्या तऱ्हेने मला पाहाल त्या तऱ्हेने मी आहे. जशी भावना तसे दर्शन ! भावना रहित असले तरी दर्शन होते.
सद्गुरु चरणात रममाण होत गेल्यानंतर त्याच्या इच्छेप्रमाणे दर्शन देतात. काही भक्तांनी असे वर्णन केले आहे, कोणी म्हणतात अंगुष्ठा प्रमाणे आहे, काही म्हणतात, मसुरेप्रमाणे आहे. आकाराला धरूनच ओंकार स्वरूपाची जाणीव मिळते. ©️