श्री विठ्ठल (पंढरपूर निवासी) – “गु” अन “रु” हा फार मोठा गहन विषय आहे. “गु” आणि “रु”, हे एकमेकावर अवलंबून आहेत. आता गु हे दर्शक आहे, रु दर्शकाला धरूनच अदृश्याचा अंत लागत असतो. गुरुचरण म्हणजे सर्वस्वाचे मूळ आहे. तेच सगुण आहेत अन तेच निर्गुण पण आहेत. एकच तत्व अनेक रूपाने नटलेले आहे, याची गती समस्त मानवांना आहे असे मी म्हणू शकत नाही. ज्याने मार्ग आक्रमण केला, त्यालाच गती आहे. काही मानव पूर्व संचिताप्रमाणे, या ठिकाणी आलेले आहेत, अन आणखीन येणार आहेत.
मायावी अंगाचे दर्शन जरी झाले तरी चरणाचे दर्शन होण्यास वेळ लागतो. प्रथम काय म्हटले आहे, आकाराशिवाय निराकाराचे दर्शन नाही, गती मिळत नाही. सगुण धरूनच निर्गुणाप्रत जायचे आहे, म्हणून सगुण उपासना प्रथम! अन त्याला धरूनच जायचे आहे. चरण हे सगुण आणि निर्गुणाचे पण आहेत. हे चरण कोठे नाहीत, याचा ठाव ठिकाणा मिळणार नाही, म्हणून वाटाड्या वाट दाखवतो, पण जाणारा जर आंधळा असेल तर त्याचा काही उपयोग नाही. मात्र मानव त्याप्रमाणे असतो म्हणून आमच्याकडूनही त्याप्रमाणे घडले आहे. ©️