श्री संत ज्ञानेश्वर – दिसे ते नासे | न दिसे ते अमर असे ||
जे दिसते, ते स्थूल दिसते. जड दिसते. अन् जे सत् आहे, ते या जडाच्या आंत आहे. ज्यांच्या आधीन हे जडत्व आहे, ते कोणत्या ना कोणत्या तऱ्हेने हे जडत्व फेकून देण्याचा प्रयत्न करतात. त्याला कोणी जाळले, तर कोणी पुरले. तत्त्वात तत्व मिलन झाल्यानंतर नाश कशाचा होतो?
नासे याचा अर्थ काय? नासे म्हणजेच ना दिसे ! तुम्ही ज्या वेळेला जन्माला आलात, तत्पूर्वी तुम्ही कुठे होता? त्या वेळेला दृश्य होता की अदृश्य होता? एवढेच, लहान होता. लहानाचे मोठे झालात. मग नाश कोणाचा आहे? जे दिसत नाही, ते पण कधी कधी दिसते.
इतकेच आहे, जे आहे ते दिसते कोणाला आणि नाही कोणाला? ज्याला दिसते त्यालाच दिसते ! ते पाहण्याची दृष्टी, सद्गुरूं शिवाय मिळत नाही. अन् दिसल्यानंतरच सेवेकरी त्यात तल्लीन होतो ना? जड हे फेकून दिल्यानंतर, समर्थ माऊली सूक्ष्माने कोठेतरी नेऊन ठेवतात. त्याला जर परत जन्माला पाठवायचे असेल तर तेच पाठवितात. पण मागच्या जन्माची आठवण त्याला नसते. जर सत मार्गी जाईल तरच सद्गुरु कृपेने त्याला मागील जन्माची आठवण मिळते. हे जे आहे त्याची मेख सद्गुरु कृपेनेच सापडते. ©️